Иако за себе одбраа посилен и поавтентичен наратив, на кој се чини се прилично достојни, мене многу ми се допадна и овој романтичниов.

Охридската тврдина буквално неосвоива.

Од почетокот на сезоната, Охрид на свој терен има само еден пораз и тоа од, се поочигледно новиот шампион на Македонија, таму некаде во ноември. Охрид прикажа и покажа игра достојна за врвни дострели. И ако на почетокот од годината многумина ќе речеа, рано е, време треба да се уигра екипа, по се изгледа дека во Самоиловата престолнина времето поинаку се мери.

Охрид вистинско задоволство ни подготвија со елиминацијата на јужниве, но моментот кога еден од најталентираните млади играчи, во дресот на Цељаните, ја лансира над пречката лепливата топка, бесценет!

Фото ГРК ОХРИД

Натпревар достоен за полуфинале на Европски куп. Градот и клубот подготвени, иако се чувствуваше големиот притисок, пред се од можноста што се укажа, се обидоа и за во оваа фаза, направија одличен настан. Картите распродадени, трибините исполнети, дресови на сите страни и Лихнида испеана во еден глас… нова туристичка атракција што секој барем еднаш во животот мора да ја посети!

Натпреварот пак од друга страна исклучително израмнет, не сум сигурен но поголема разлика од 2 гола немаше, добри голмани, нашиот исклучителен. Борба за секоја топка и уште поголема за секој гол.

Охрид се етаблира како сериозен играч на македонското ракометно небо, верувам во проектот и посакувам да не биде моден блесок. Со време градот и сите битни фактори да се сложат за вредноста на ваков еден проект од повеќе аспекти и да потпишат платформа на долги патеки. Колку вредат насмевките на Охриѓани и колку млади веќе утре ќе сакаат да го облечат дресот, тешко ќе може со една равенка да се пресмета, но придобивките се несомнени на долги патеки.

Ајде Охриде до нова европска титула за македонскиот ракомет!

The post Охридска ракометна Пролет! appeared first on Само Ракомет.

Плејофот татни, секое коло дерби, нешто што одамна не сме имале.

Осврт на викендот со две ултимативно тешки и важни утакмици. Бараме зошто и како, поставуваме тези и уживаме во ракометот.

Погледнете…

The post Љубопитноста Мачката, Притисокот Пелистер ? САМО РАКОМЕТ С5Е6 appeared first on Само Ракомет.

Во неделава на европско тло, фигуративно речено, оти европа упорно не не смета за присутни, три наши екипи ќе истрчаат на герфлорот со големи амбиции.

Убаво е чувството да си дел од нешто важно. Значи дека работиш правилно, добро целиш. Македонија, таква каква што е, со Ракометот бележи парадокси.

Екипи во Лигата на Шампиони безмалку три децении, екипи во останатите купови во континуитет. Годинава освоена титула преку ликот и делото на најмладиот наш ракометен колектив, РК Алкалоид. Незнам дали некој од нашето опкружување може да се пофали со вакво присуство.

Денес Вардар излегува прв на дуел со еден добро познат муштерија. Кристијанштад со години беше топовска храна за црвено црните. Работите се сменија но дали и навиката. Во еден силовит занес е Чупко со својата легија на недоречени странци и дома и во европа (простете за малото е, но мали се во душата, им прилега). Коефициентите, на кои уживам да им се изнасмеам кога во прашање е ракометот, повторно во европски дух. Не потценуваат…

Дали егото на старата курва или пркосот на Балканот, дали префинетиот режим на тренирање или сировиот квалитет, ќе дознеме вечер. Вардар по потврда на непобедливоста оваа сезона.

Во Битола пак пристига еден сериозен и машки колектив, кој се здоби со неколку силни удари изминативе денови. Колектив создаван за високи дострели, но многупати во спортот сведочевме дека сето тоа не е доволно. Пелистер како никогаш досега игра зрело на крилата на Митревски и Манасков и самоуверено на база на Кузмановски. Влегуваат во секој натпревар со една цел, независно кој е отспротива. Ние сме Шампиони е девизата на зелено белите!

Пред точно 2 години, еден поинаков Пелистер беше на праг на голема победа, избега за минута две. Дали е време за одмазда?

Во еден од најубавите градови на планетата, Охрид пак, расте една нова приказна. Делумно препозната меѓу ракометните работници но сеуште недокажана.

Ја градат приказната збор по збор, сите алтани. Вистинско задоволство е да се пратат нивните чекори. Го дигнаа нивото и ја создаваат големата четворка. Градот споро одговара, но како што рече еден наш голем спортист, по првите успеси ќе пристигне и поддршката. Во дуелот со едно легендарно име од балканската ракометна митологија, Слога од Добој, Охрид ја гледа својата шанса. Ова всушност е шеснаестфинале и со победа Охрид тропа на вратата на големото друштво во третиот куп.

Со позитивна мисла и верба во 3 победи на македонските клубови!

The post Можеме ли чекор понатаму? appeared first on Само Ракомет.

Бројот на напади, а со тоа и бројот на удари кон голот во просек е драматично помал од просекот на врвните европски екипи.

Годинава како никогаш порано имавме можност за инвазија на европско тло, ракометно, но математиките и есапите не се совпаднаа некако. Имавме, и сеуште имаме, можност да си ги измериме квалитетите, потенцијалите, храброста, дрскоста и на крајот ракометното знаење.

Но како се движи линијата на фронтот?

Во предигра на сезоната во Македонија за наша огромна среќа имавме три меѓународни турнири. ГРК Охрид ги освои двата поголеми а Пелистер 2, помалиот. Продефилираа странски екипи од типот, Црвена Звезда, Бурса, Раднички, Партизан, Нексе, Киндил, Тримо и Динамо. Од друга страна Алкалоид беше на словенечко хрватска турнеја и се врати со штитот.

Првата фаза успешна но дали и меродавна!?

Што следеше, елиминација на помалку фантастичен начин на Бутел од Дуделанж од Луксембург, во првото коло на ЕХФ Купот. Елиминација на Алкалоид од супер бундеслигашот Хановер во Евро Лигата. Дебакл на Тиквеш во првиот дуел со Бешикташ во Евро Купот, со постигнати 3 голови во првото полувреме… Уф…

Малку светлина на фронтот ни донесе воведната победа на Шампионот Еурофарм против реномираниот Загреб, како и на Вардар против Сесвете и пласманот на Охрид во втората фаза преку аматерите од Баку. Но, ниту Загреб некогаш бил послаб ниту Сесвете е екипа од европскиот крем, ниту Азербејџанците знаат што е ракомет.

Што друго можеше да се забележи?

Дуелот во Лигата на Шампиони против Барселона пак, ми донесе и уште неколку констатации, битолската публика го промени курсот, конечно со афирмативен наратив за своите, без разлика на резултатот, салата крцкаше, дрес код зелено бели, фан зона, милина… но, салата премала, влезови премалку, воздух нема, за момент морници ме полазија кога ја погледнав ламперијата на таванот…

Во Скопје пак, темата инверзна, неспособноста на клубската администрација да анимира публика доведена до совршенство. Со две три објави на социјалните медиуми работата не е завршена. Со едвај 1500 гледачи срамот за жал пренесен на Арена ширум регионот.

Клучно прашање и за Охрид кога во толку очекуваната сезона од евро настапите на првиот двомеч имаше околу 70 гледачи?!

Што не очекува наскоро, Пелистер се соочува со реалноста дека со ваков ростер и експериментални тренери во рамките на рангот на буџетот, може да сонува осминафинале. Вардар веќе следната недела ќе затропа на вратата на сериозните клубови и за момент ќе се соочи со реалноста. А за Охрид ждрепката многу ќе значи.

Со констатација дека публиката може да се донесе само на натпревари од Лигата на Шампиони во дуелите со гигантите, се прашувам дали некаде и нешто грешиме?

Дали само брзината спомната во првиот пасус е клучна или има и нешто друго, дали и полупразната сала во Лисабон во дуелот со гигантот Веспрем подоткрива уште нешто, дали е до нас или до ракометот…

The post Ракометни евро интеграции? appeared first on Само Ракомет.

Викендов ракометните сладокусци ќе имаат прилика да ги погледнат долго најавуваните дуели од новопроектираната ГОЛЕМА ЧЕТВОРКА на Македонскиот ракомет.

Во Борис, домаќин Вардар, гостин Охрид, а пак во Автокоманда на Алкалоид му гостува шампионот Еурофарм Пелистер.

Одличен е потегот натпреварите да се играат во два дена.

Долго во кулоарите провејува наративот дека Македонската ракометна лига е најјака на Балканот но и пошироко. Се мачиме да ги најдеме показателите за тоа, да не биде само чувство.

Дали станува збор за буџетите на клубовите, бројот на странци кои играат, бројот на клубови кои настапуваат во Евро Куповите, успесите во истите, хонорарите на играчите, квалитетот на истите или на тренерите.

На прва пак и на втора дефинитивно сме пред сите.

Фото РК Вардар 1961

Имам горчлив вкус по испаѓањето на Бутел од Дуделанж, но тоа не го менува сето горе изнесено.

Штета што не нема на регионалните спортски канали од каде би добиле фидбек за евентуалната гледаност, но еве предлог до новото амбициозно раководство малку да се растрча.

Колку Охрид по освоениот бод со Алкалоид ќе се дрзна да го нападне Вардар, кој се мачеше во подготовките и колку Алаклоид кој е во благ ногдаун по елиминацијата од германците, ќе може да се спротивстави на забревтаниот Пелистер се прашања на кои одговорот најдобро се добива во сала некаде во 4-5 ред во висина на линијата за 9 метри.

Во сабота Вардар Охрид а во недела Алкалоид Пелистер

Се гледаме во сала!

The post Големата четворка ги вкрстува копјата appeared first on Само Ракомет.

ГРК Охрид е амбициозен проект кој полека ги дава очекуваните резултати, кој се нивните планови и кој стои зад стратегијата…

Погледнете..

The post Кирил Пецаков, Ги охрабрувам градоначалниците да инвестираат во Ракометот! appeared first on Само Ракомет.

Во 19,00 во Автокоманда, на гости кај Алаклоид пристига Македонскиот Шампион, Пелистер. Дуел кој можеби ништо нема да реши, сигурно ништо нема да реши, но ќе постави насоки и одгатне неколку енигми.

Прво и основно, дали Алкалоид е печен за нов Шампион?

Во својата 4 та година од формирањето, со јасна визија, порака и цел, ракометниот клуб Алкалоид дојде во позиција да биде легитимен кандидат за титула. Дали само буџетот е тој што е пресуден или пак визијата, планот и системот? Совршено е јасно дека Алаклоид во моментов не е најскапата екипа во Македонија. Кога екипите не би ги криеле буџетите како змијата нозете би ни било појасно, но факт е дека тимовите на Пелистер и Вардар чинат повеќе.

Второ дали Пелистер сепак е најдобриот тим во Македонија?

Покрај сиот притисок од нестрпливата Битолска јавност и непријатната атмосфера која се движи на моменти од еуфорија до очај, што ја пласира најракометната чаршија врз својот клуб, Пелистер сепак не изгледа толку лошо. Тој во Лигата на Шампиони сепак прикажа неколку интересни натпревари, во домашното првенство пак, поразот од Вардар никогаш не треба ништо посебно да значи, знаејќи го ривалитетот и неизвесноста на сите дуели. Дали Ангеловски ги држи чврсто уздите ќе видиме денес.

И трето а не неважно, дали е можно Македонскиот концепт да го порази Легионерскиот. Со години за успех во спортот се бараат странски засилувања. Ни нашиот ракомет не беше имун. Факт е дека иако сите го сметаме ракометот за спорт број 1, реалноста е сосема поинаква.

Вложувањата од државата се само декларативни, или поточно речено го одржуваат во живот мртовецот, односно добар дел од средствата кои се слеваат во ракометот, ја напуштаат Македонија или најчесто се ненаменски потрошени. Еве зошто. Од се она што досега Вардар, на пример, го добил на име на ваучер, создал за десетина години 1, со букви еден репрезентативец. Нема своја сала, а нема ниту еден клуб во Македонија, нема школа за најмлади а младинските категории ги пополнува со збратимени клубови. Слично е и со останатите поголеми клубови. Факт е дека, талентите доаѓаат од за пошироката јавност небитни клубови, Богданци, Гевгелија, Аеродром, Струмица, Петровец, а токму тие клубови се на дното од листата за поддршка. ПАРАДОКС зарем не?!

РК Алкалоид ќе биде лабараториското глувче кое ќе ни покаже дали и како може да се создаваат играчи и во вистинска смисла на зборот ракометот да биде број 1.

Во моментов работите се менуваат, па Македонија доби министерство за спорт. Дали тие ќе ги детектираат проблемите и ќе понудат решение ќе видиме наскоро. А јас подготвувам предлог мерки и наскоро ќе ги објавам.

Во 20,45 часот во култната Јане, домот на 2 европски титули, доаѓа Порто. Тим кој пред години со задоволство сме го мачкале на леб, но работите се сменија. Па така сега црвено црните со страв го пречекуваат португалскиот тим, и навистина од оваа точка е тотална непознаница како тимот, Вардар, ќе изгледа на терен. Едно поради дијаметрално спротивните изданија во првите две кола, друго поради зачестеноста од повреди и зголемување на листата на повредени. Последнава на Борозан за риплиевата книга Верувале или не, пример кој уште еднаш јасно и гласно не опоменува сите а треба да ги разбуди пред се политичарите, а тоа е, дека прво својот двор треба да си го дотераме а потоа да одиме на гости!

До крајот на неделата остануваат неколку интересни европски натпревари. Многу важни по две основи. Прво да потврдат дека Македонскиот клупски ракомет не е само на хартија, и второ да одгатнат кој клуб со каква цел настапува.

Пелистер од една незавидна позиција да дојде до прва победа, а Алкалоид и Охрид да го потврдат пласманот во второ коло.

Да уживаме во Македонскиот ракомет !

The post Некои работи ќе бидат појасни! appeared first on Само Ракомет.

Запомнете ја сите љубители на Македонскиот ракомет оваа недела!

Месец Октомври, 2024 та година, Македонија има 4 клубови, претставници во машката конкуренција во европските купови. Ако го додадеме и дуелот на Тиквеш пред неколку денови во првото коло од ЕХФ Купот, чинам дека ова е историски период за Македонскиот машки клупски ракомет.

Да одиме со ред.

Прв на терен ќе истрча Вардар. Денес во 18,45 часот во Германија го игра натпреварот од второто коло во ЕХФ Евролигата против Мелсунген. Шансите за успех сведени на ниво на статистичка грешка, но кому тоа нешто му значи. Вардар се врати на европско тло со многу убав перформанс и победа над Исландски Валур, па сега секој следен натпревар ќе биде за уживање и на играчите и на публиката. Дополнително натпреварот обременет со присуството на црвено црните во таборот на противникот! Парондо, Криштопанс и Мораеш, со сигурност ќе измамат по некоја емоција за едно време минато. Од Вардар, пред се очекуваме структурна консолидација, логистичко екипирање, како предуслов за враќање на старите добри денови. Играчки веќе ни е сосема јасно дека Вардар скаутира и регрутира најдобро што може.

Во четврток на мегдан со варварите од Полска, незнам со какви се санкции ќе се соочеше Македонскиот ракомет доколку на наше тло се случуваа сцени од полското дерби, оди Пелистер. Делумно рехабилитиран по ремито со Спортинг, но сеуште во благ нокдаун, од настапите во Лигата на Шампионите. Пелистер одамна нема што да загуби, па секој следен натпревар може да го користи повеќенаменски. Дали да испроба тактички или играчки варијанти, небитно, релаксирани секако имаат поголеми шанси за сензација. А дека сензациите се можни, многу добро знаеме.

Сабота е ден за двојна програма, во 19,00 часот Алаклоид и Охрид, ја започнуваат својата одисеја. Дали мораше во ист ден и во ист термин, навистина незнам, но јас со задоволство би ги гледал двата натпревари.

Прво во Скопје, Алклоид кој од ден на ден се повеќе и повеќе ги собира симпатиите на ракометната фела. И не само затоа што е предводен од Македонски деца и Македонски тренер, туку затоа што по повеќе критериуми ни делува сериозно, компактно, модерно па дури и авнгардно за ова поднебје. Како ќе изгледаат Митев, Серафимов, Галец, Симба и компанија, една година поискусни, во дуел со релативно поплиток противник, и дали целите на Кралот се да игра европски натпревари до доцна следната пролет, ќе дознаеме многу брзо. Мојот оптимизам нескриен, а апетитите зголемени по настапот на минатогодишниот освојувач на овој куп во Скопје минатата недела.

Во Охрид сакам да одам и кога нема ракомет, езерскиот бисер впрочем најубав по крајот на туристичката сезона. На чорба во Лагадин, Белвица во Трпејца, Пица во чаршија и чаша вино во Куба Либре, одам без двоумење. Овој пат зачинето со одличен ракомет би било генијално. Храброста на Охрид, во ангажирање на во моментов најголемата легија на странци покрај вардаровата и пелистеровата, одлучноста да имаат добар ракометен клуб, сериозноста во организирањето на турнир од меѓународни рамки, мора да се истакне, пофали и поддржи. Рибари се тука, на клупата е легендата Алушевски, општината ветар в грб, па среќно в сабота иако противникот е за нијанса или две фаворит.

Дали мојата теорија за големи нешта на репрезентативно поле од сезоната 2025/26, почнува да се остварува сеуште е рано да се каже.

The post Недела над неделите appeared first on Само Ракомет.

Понекогаш само жалам што не се занимавам со новинарството, професионално. Да можам да се посветам 24 часа дневно, 7 дена во неделата.

Рубриката на која кумашинот и е кум, CATCH THE MATCH, одсекогаш ме пленела, но изискувала од мене и најмногу ангажман. Да, ако нешто работам сакам да биде како во песната на Балашевиќ.

Ракометниот викенд, за кој често имав забелешки околу термините, почнува денес. Браво, така треба, ќе ги гледам безмалку сите натпревари со доволно време за подготовка и сумирање впечатоци.

Денес Алкалоид го пречекува клубот од градот феномен. Струга е ракометен феномен, постојано и постојано, од таму пристигаат нови и нови ракометари. Дали е до Бељвицата, до Дримот или нешто друго, ветувам ќе откријам еден ден. Тие само пред некој ден станаа Училишни шампиони на Македонија по кој знае кој пат.

Алкалоид по периодот со резултатски потреси, се стаблизира, дури и играта му е се поубава и погледлива. Македонскиот Вицешампион ќе има ѓаволски тешка задача да го повтори успехот од минатата сезона, но во констелација на сегашните односи на силите, вложените средства и бројот на странски аквизиции, сеуште одлично котира.

Во сабота во Јане пристигнуваат Лозарите. Дали Вардар подготвува освета, незнам, но знам дека интензитетот на тренинзите го сменија. Поразот во срцето на Тиквешијата, многу боли. И како што Раде во гостувањето во подкастот се потсети, титулата не се реши ниту во Скопје ниту во Битола, ами во Кавадарци, трилер !

Во недела е најважниот натпревар оваа сезона за Битолчани. Во Охрид! Втор дел од трилерот! И ако кладилниците ја постават оваа утакмица, верувам дека ќе има интерес. Пелистер како никогаш порано, под палката на мојот пулен, делува стабилно. Малку недостасуваше Пурино да влезе и во аналите на Македонскиот ракомет како тренер кој во две сезони, со две екипи, во две различни лиги, прва и супер, не доживеал пораз!

Гладијаторите пак, ама баш ме интересира како го добија името, а не е лошо, патем речено, водени од созреаниот Аљуш, на крилата на најавените засилувања и буџетски и играчки за следната година, ќе се обидат во, и за нив најважниот натпревар во сезоната да направат сензација. Сензација која ќе го врати скопски Вардар на тронот, а ќе ги однесе Охриѓани на високото второ место!

Во Скопје на маргините на колото, дуел на двата преостанати Скопски клубови. Тие погонувани на многу искуство и сиров и млад талент, за сите претставуваа проблем. Во овој двобој ќе си ги одмерат силите и ќе се обидат да го избегнат претпоследното место на табелата.

Кој сака ракомет ќе има што да гледа, а кој сака и да патува, нека вози внимателно кон Охрид, автопатон уште не бил готов !

The post Пелистер ја брани титулата! appeared first on Само Ракомет.

Викендов исполнет со ракомет, ми понуди неколку теми за размислување, но ми откри и нешто сосема ново.

Во фокусот натпреварите во Јасмин и Автокоманда, иако факт е дека и тој во Пролет имал што да понуди.

Патувањето од сагата Ракометен туризам, не одведе повторно во Кавадарци. И веднаш ќе заклучам, девојките од Мерлин го спасија денот. Нивниот највкусен сендвич ги залечи раните од очајниот ракометен настан.

Што толку ме разочара?

Имајќи ги в предвид импресиите од гостувањето на Вардар, и победата на домаќините очекував вулкански ерупции, потреси на тиквешкото тло и тензија до вжештување. Наспроти очекувањата пред и во Јасмин, амбиент од крводарителска акција на ветераните од шаховскиот клуб. Невообичаено тивко, мирно, хм, нешто не е во ред или ја промашив салата?

Следеше уште поголемо изненадување, навивачките групи, за кои знаеме дека се збратимени, на иста трибина, и заедничка фотографија на двете екипи како на кампување со извидници покрај Тиквешко. Овде ракомет нема да се изнагледам !

Следеше уште една помалку морбидна сцена, за која знам дека била со добра намера но очајно изведена. Во светот на спортот за жал изминативе години бевме сведоци на неколку тешки сцени, во кои спортистите паѓаа на теренот, губеа свест, или беа клинички мртви, па во наредните денови сите со нетрпение очекуваа позитивна разврска. Праќаа пораки за поддршка, носеа маици со Издржи, Со тебе сме и слично. Но ниту еден од тие настани не се однесуваше на играч кој скинал лигаменти. Црните маици со натпис НЕНАД СО ТЕБЕ СМЕ, прилично несреќно вметнати во приказната.

АИР Струга е еден од моите омилени и со нетрпение го чекам неговото враќање на паркетот!

Под превезот на хуманитарниот настан, текот на ракометниот многу конфузен. Зелените лабави, Розевите збунети. Се чини само тренерот на домашните посветен и уверен дека ова ќе биде вистински натпревар во кој ќе може да ја изведе сета своја ракометна магија.

Победија, сепак заслужено Пелистерци.

Фото РК Еурофарм Пелистер

Во Автокоманда, поинаку. Организациски на високо ниво, навивачките групи на своите позиции. Амбиент вреден дерби. Екипите со по некој отсутен, генерално истрчаа со своите најдобри во моментов. Понатамошниот текст само за најдобрите.

Ах, да, во Кавадарци го видовме Миркуловски, го видовме и во Автокоманда, се отворија теми и прашања. Но кога на трибините го здогледавме и Гарсија Парондо, прашалници еден куп?

Во редовите на Вардар, Томовски ја потврдува класата. Човекот е октопод, ги откажуваше упорните Фармацевти од напад во напад. Мечка е мојот нов Столе. Човеку ти си незапирлив истовремено и непробоен. Тимот со него и без него ден и ноќ. Николиќ, уште еден од плејадата Српски таленти кои можеби во Скопски Вардар ја започнуваат својата кариера. И на крај но не и небитен, Првиот Македонски Самурај. Човек од едвај пеесетина килограми, мастермајнд на ракометната игра, волшебник со топката, човек за кој можеби и сите овие гореспоментаи се дојдени, човек со кој Вардар е сосема поинаков тим. Моментот кога десноракиот самурај постигна гол со лева пропратен со длабок УУУХХХ од трибините.

Од спротива пак, се раѓа и расте нашиот пандан на Косуке. БУМ БУМ Марко, од натпревар во натпревар ме воодушевува се повеќе и повеќе. Тој е смел, одлучен, силен, безкомпромисен, решен и сигурен во себе. Прави разлика, се профилира во лидер, за жал за него и неговиот тим, за жал и за тренерот Лазаров, на овој натпревар немаше поддршка од своите.

Тимот на Кире, се соочува со реалноста, пред нив е долг и макотрепен пат. По почетната еуфорија и изненадување сега станува потешко. А на маката се познаваат јунаците, верувам Алкалоид ќе создаде неколкумина.

Дали скаутите дојдоа по Косуке, Томовски, Мечка или Марко незнам, ама дефинитивно имаа што да видат.

Дали првенството е најинтересното од поодамна, дефинитивно, дали нашата теза за тројца претенденти е точна, не е, има повеќе.

Уживаме во Македонскиот ракомет, се надеваме на подобра иднина, поквалитетни тимови, играчи а со самото тоа и репрезентација.

Во ЕХФ неделата ќе се занимаваме со трите репрезентации, кадетите, младинците и сениорите и за момент ќе ги заборавиме навивачките бои. САМО ЖОЛТО ЦРВЕНА ќе се вее.

ДА ЖИВЕЕ МАКЕДОНИЈА !

The post Македонски Ракометни Прегрупирања !? appeared first on Само Ракомет.