Македонската ракометна федерација го продолжи договорот со крунисаниот крал на ракометот, за наша голема среќа, Македонски крал, Кирил Лазаров, селекторот на Македонската ракометна машка репрезентација, до 2029 та година.

Стратешки потег за кој симнувам шапка. Само со долгорочни и визионерски потези можни се успеси. Веднаш пред очите ми е оној Бено, човекот кој Магдебург го врати на патеките на кои овој клуб бил пред неколку децении.

Потег вреден за поздрав и од временска рамка, во очи на уште едно пеколно тешко натпреварување за Македонија. Одиме на Европско повторно против најдобрите Данска, против најбрзорастечките Португалија и против Романија која со години се мачи да се врати на местото кое го сака а можеби и заслужува, европскиот ракометен крем.

Се навраќам на еден осврт од 2021 та, веднаш по дебаклот на светското првенство во Египет…

Македонија подолг период игра прилично променливо. Ние и во најдобрите времиња не сме биле страв и трепет, но ниту Данска ниту Германија … никој неможел да впишува сигурни два пред натпревар. За жал тоа се смени па сега стрепиме од Белорусија, Австрија Украина … екипи кои порано имале постери од нашата репрезентација на своите ѕидови ! Правевме избор на селектори од кои очекувавме чекор повеќе, па така имавме и многу звучни имиња, Вујовиќ, Червар, Гонзалес, Обвран, Ѓукиќ … нашите Савевски, Шундовски, Темелковски … но некако тоа не се случуваше. Анализите некогаш наговестуваа но никогаш не даваа прецизен одговор. Генерално се сведуваше дека имаме мал фонд на играчи, и дека понекогаш немаме доволно долга клупа или недоволно добра физичка подготвеност. Понекогаш зборувавме и за атмосферата во соблекувалната, за таборите, за влијанието на јавноста за притисокот. Но како да постои една празнина, како да премалку зборувавме за ракометот кој го играме. Египет конечно ги извади работите од под тепихот. Македонците се влечеа по теренот, беа неорганизирани, се распаѓаа тактички и физички.. го допревме дното ?

Текст во кој со неизмерна радост ја одбележав одлуката Кирил Лазаров да биде нов селектор на Македонија.

Не помина многу време, Кире го имаше своето деби од соништата, во Скопје падна ДАНСКА!

Потоа работите се движеа … во генерално две насоки. Македонија имаше пред себе две задачи, не напишани но повторувани, па нормално станаа наратив.

Првата, смена на генерации, од денешна перспектива завршена во целост, безмалку. И втората, таа дефинитивно комплетирана во целост, континуитетот на настапи на големи првенства не смее да се прекине!

Што на врелите Македонски навивачи им недостасуваше низ годиниве?

Успех се разбира, на прво место, имајќи ги в предвид пласманите: 2022 на Европското бевме 22 ри, зад нас беа само Босна и Украина. 2023 на Светското 27 ми, зад нас останаа Јужна Кореа, Саудиска Арабија, Мароко, Алжир и Уругвај. 17 ти во Германија на Европското 2024, со подобрена крвна слика и екипи од типот на Србија зад нас, и конечно 15 ти во Хрватска на последното светско, кога в грб ни гледаа на пример Шпанија, Австрија, Чешка, Тунис, Полска. А сето ова низ призмата на 2012 та и пречекот во Скопје по освоеното 5 то место во Европа!

Растот е евидентен, спор но евидентен.

Фото ИХФ

И второ, се враќам на Фалангата, ни недостасуваше крв на теренот. Категорија тешко мерлива но јасно детерминирана. Или има или нема!

Категорија исто така многу важна во современиот спорт, а некаде доведено до совршенство, на пример американските НБА или НФЛ, а јас инспирација барам во легендата на македонското новинарство Југо Костовски, што ми недостасува е СТАТИСТИКАТА.

Се обидов да извадам базична статистика за успехот на Кирил Лазаров како предводник на машката ракометна репрезентација на Македонија. За напредна ќе ми треба многу повеќе време и енергија.

Македонија под палката на Лазаров одигра 40 натпревари. Официјални во квалификации, бараж и натпревари од Европско и Светско првенство. Пријателските не ги земав в предвид тука. Забележа 18 победи, 3 реми и 19 порази или процент на успешност нешто под половина, 48,75 %.

Малку поразложено, сликата само од големите натпреварувања, 18 натпревари, 5 победи, 2 реми и 11 порази, или 33,33 % на успешност со извојувани само 2 победи во првата фаза и 3 во втората, еднаш президент куп еднаш главна фаза.

Од податоците кои ме фасцинираат издвојувам, без некој посебен редослед и без голема прецизност, а само од последното светско, истрачани контри 17, за споредба Данска 70, Португалија 59. Асистенции 66, Шведска 108, Италија 98, Технички грешки 11 по натпревар, Данска и Хрватска по 7.

Колку е далеку сонцето?

Се навраќам на архивата повторно, по крајот на европското во 2022 ра еве малку статистика…

Реализација на шут. Франција 75%, Данска 73%, Германија 71%, Холандија 70%, Португалија 68%, Исланд 68 %, Унгарија 64%, Шпанија 60%, МАКЕДОНИЈА 59%.Изгубени топки по натпревар. Франција 5,5, Данска 5, Германија 5,5, Холандија 11, Португалија 10, Исланд 8,5, Унгарија 7, Шпанија 5,5, МАКЕДОНИЈА 15.

Со задоволство ќе ги прифатам сите можни корекции на вредностите. Се разбира и ќе ги објавам.

Македонија е дел од ракометниот крем несомнено, но за да станеме јагодка ни недостасуваат многу состојки. За жал повеќето се неракометни, не спортски попрецизно. Наша задача е да сториме се што можеме да бидеме ветар в грб на Македонските херои и амбасадори.

За МАКЕДОНИЈА !!!

The post ДА ЖИВЕЕ КРАЛОТ! appeared first on Само Ракомет.

Во неделата, во едни исклучително герила услови, преку таканаречен пренос во живо на страница на еден социјален медиум, имавме можност и среќа да го гледаме реванш натпреварот од полуфиналниот дуел во ЕХФ Купот, помеѓу Македонскиот РК АЛКАЛОИД и Норвешкиот Рунар.

Воведов со идеја да ја доловоам апсурдноста што со себе ја носи ригидната ЕХФ, популаризација на ракометот од една страна и мизеријата на промоцијата од друга.

Просто е неверојатно завршница од еден така важен куп за екипите кои им дишат во врат на најдобрите, ЕХФ да ја испрати само преку live ticker на својата и така хаотична веб страна.

Благодарение на некои ентузијасти или веќе незнам што, Рунар ТВ, имавме можност да следиме што се случува на теренот. И се разбира за сите љубители на теориите на заговор, последните решавачки минути во инфаркт натпреварот, вклучително и изведувањето на седмерци, неможевме да го следиме!

Епилогот сепак во наша корист. Македонскиот РК Алкалоид предводен од легендата на светскиот ракомет, еден од најдобрите десни бекови во историјата, Кирил Лазаров, издржа и по пеналите се најде во финалето.

Норвежаниве го организирале реваншот во еден огромен контејнер, најверојатно пренаменет за играње ракомет. Во него една пристојна група Македонски навивачи. Грешка број 1. Нашиве деца, се навикнати да играат во мирна атмосфера и во мали сали. Фамата околу поддршката од публиката се однесува кога сме домаќини, не гости.

Грешка број 2, (оваа на ехф ќе е е) Италијанските судии. Ако во Скопје ни сместија ракометни аналфабети, Италијаниве се покажаа како многу подобри познавачи на ракометот. Од друга страна, нивната топла крв, генетски поблиска до нашата, балканска, сигурно (на ум ми доаѓа сликата од последната акција на Рунар)!

Грешката број 3 кај мојот херој од линијата. Бјарте, чинам по втор пат го потцени, Киро, децата, РК Алкалоди и во крајна линија Македонија и Македонскиот ракомет. Тој беше убеден дека во едни вакви стерилни услови, со една блиц криг стратегија и многу ќотек, ќе го реши натпреварот за 10-15 минути. Играше овојпат 6 на 6 и не ризикуваше, и се чини на крајот тоа и го чинеше елиминација.

Од друга страна пак, Киро покажа една исклучителна, не карактеристична за него смиреност. Во услови кога на терен го нема еден од најголемите таленти во последниве децении, Марко Митев, а кога на само неколку денови пред реваншот го изгуби и факторот X, од последните недели, Игор Ѓеоргиев, тој покажа карактер и докажа дека победува тимот и системот а не поединците.

Во првите редови на фронтот ги истовари сите можни сили и адути кои ги имаше, а не се вкопа и не постави фортификациски објекти. Му даде огромна слобода на Дамјан, а малиот испорача како да игра ракомет на европско тло 10-15 години.

Во Алклоид клучни улоги имаа и луѓето кои се викаат Мартин. Па така Серафимов испорача 8 погодоци, Велковски 4 но покажа и доста лидерство, а пак новајлијата Ивановски ја надополнуваше празнината од Митев и Ѓеоргиев со стил на игра и ефикасност.

Лазаров повторно играше со широк ростер, и повторно во игра не ги видовме Савревски и Младеновиќ. Голманите не беа фактор во текот на самиот натпревар, но Галевски беше и тоа како голем фактор во самиот финиш и во серијата пенали.

Мизеријата не ЕХФ и во статистичките извешати без да коментирам споделувам линк…

Сезона за историја има најмладиот Македонски ракометн клуб. РК Алкалоид, во супер краток период од основањето успеа да постави фантастичен систем, да изгради респектабилен тим и во исклучително кратко време да почне да ги жнее плодовите од својата работа.

За нас пак од непроценливо значење е тоа што успехот се должи овој пат на сопствени ресурси. Со само двајца странци кои дефакто немаат носечки улоги, со 100% Македонски стручен штаб, Алаклоид покажа како треба и како може.

Во очекување на двомечот со АЕК, спортската среќа на наша страна, па реваншот ќе се игра во Скопје. Скопје знаел да биде дом на шампиони па верувам ќе биде и овој пат така.

Очекувам конечно изборот на сала да падне на Борис или Јане, па во огромен број да ги поздравиме и поддржиме нашите деца во овој досега за нив најголем предизвик!

The post Фармацевтите ја решија Скандинавката! appeared first on Само Ракомет.

Безмалку поминаа 80 години од почетокот на клучната операција во втората светска војна. Денот Д или операцијата ОВЕРЛОРД во јуни 1944 година значеше почеток на крајот на една од најмрачните ери на човештвото. Падот на нацистичка Германија.

В недела во Борис, Македонија падната на колена ја пречекува ракометната сензација, Фарски! Со негатива од 7, но со уште полошо чувство во стомакот, дека на првиот натпревар не личевме на ништо, гласно, во себе, на пиво во маало или на тастатура, ги бараме можните сценарија. Уште поважно пак и од тоа, ја одгатнуваме загатката, дали е подобро да изгубиме или не?

Повеќе од јасно е дека има 3 можни сценарија. 1. Да изгубиме и дома, оти тоа со претставата во Торшван и го заслуживме, 2. Да победиме со мала разлика, и со наведнати глави да се разотидеме или 3. Да ги згазиме со +10 или повеќе, па насловите да бидат Се е на свое место!

Во третото сценарио, кое очигледно има доста приврзаници, вклучуваме еден куп неракометни фактори. Фарците заглавија по аеродроми и секако тоа ќе остави белег врз нивната концентрација, свежина и севкупно перформанс. По аналогија на домашното, германско судење на Фарски, од Турците очекуваме стабилен ветар в грб, Публиката, многу важен фактор тука кај нас, охрабрена од падот на предавничкиот режим на штотуку завршените избори, можно е да дојде во висок режим на работа, впрочем и самите Фарци во најавата на двомечот ја нотираа како фактор. И последниот сепак ракометен, можно е и самите репрезентативци, малку посрамени од нивниот перформанс, а реално имаме доста добри момци во селекцијата, да стегнат заби и да тргнат жестоко.

Тука ќе следи загатката, дали е добро вакви какви што сме да се пласираме на светско? Од аспект на вложеното и прикажаното на последните 4-5 смотри, можеби е добро малку да се одмориме и регрупираме. Но од аспект на одржување на и така тенкиот интерес кај младите за влез во сала, апсолутно е важно да сме таму каде што се најдобрите!

Доаѓам до насловот. Поминаа цели 3 години од како клупата на Македонија ја презеде најдобриот спортист што Македонија некогаш го дала и имала. По шокантната победа на дебито против семоќната Данска, следеше прилично трнлив период. Успешно сработени квалификации за европските 2022 и 2024 како и за светското 2023, но очајни настапи на истите. Кире бараше трпение бидејќи повеќе од јасно беше Македонија влегува во жестока транзиција и промена на многу константи. Доби мирно море од федерацијата но многу бура од јавноста и дел од медиумите.

Дочекан како величина, денес исправен пред најголемиот тест. Дали Кралот успеа да ја вметне својата филозофија во главите на играчите, дали тие му веруваат и впрочем дали е тој вистинскиот ракометен експерт како решение за долги пруги?

В недела, некаде околу 21,00 часот навечер, ќе знаеме се. Од однесувањето на тимот, повеќе него од самиот резултат, ќе дознаеме од каков материјал се градени. Фокусот на Кралот најголем!

За Македонија и во добро и зло !

12.05. 2024 Во Скопје, главниот град на напатената Македонија, во СЦ Борис Трајковски, реванш од баражот за пласман на светското првенство 2025 година.

Македонија против Фарските Острови (верувале или не)

The post Денот Д за Кралот! appeared first on Само Ракомет.

Македонија во спортот има еден GOAT, најдобриот ракометен десен бек на сите времиња!

Неговите рекорди, постигнати голови на едно Светско Првенство и прво место на вечната листа на постигнати голови во Лигата на шампиони, долго нема кој да ги загрози.

Како Кире се снаоѓа во новата улога, кои му се предизвиците, има ли грешки, како понатаму, се теми за кои долго разговаравме…

The post Кирил Лазаров: Ние веќе успеавме и ќе бидеме се подобри ! appeared first on Само Ракомет.

Ми претставува исклучително задоволство и огромна чест да можам да разговарам за македонскиот ракомет со најдобриот десен бек што ракометниот свет го запознал. Кирил Лазаров

Долго време македонската ракометна па и поширока јавност беше во очекување на Вашата одлука што после играчката кариера. Кога одлучивте дека тренерската задача е следна?

Кирил Лазаров: Сеуште сум активен играч… Ракометот е мојот живот !

Веќе подолго време се подготвувам за тренерската кариера. Многупати ми било поставувано тоа прашање во минатото, но вешто го избегнував и се подготвував во мир и тишина за она што треба да следува после играчката кариера.

Некогаш многу помпезност, најави и ветувања можат само да ти наштетат. Сакам да работам квалитетно без многу најави и без еуфорија. На блиски луѓе на кои им најавував дека ќе се занимавам со тренерство, пробуваа да ме разубедат бидејќи тоа е тешка и неблагодарна работа… Знаеа да ми кажат… за тебе секогаш ќе има квалитетна работа, поготово за се што имаш направено во кариерата и за Македонија… меѓутоа јас го знам својот пат и верувам во тоа.

Неможам да го замислам животот без предизвик, а тренерската работа го нуди токму тоа. Гладен сум за успешни и врвни достигнувања, тоа ме држи во живот.

Ја преземавте Македонија во еден од најтешките моменти. Безмалку го допревме дното. Тактички или сепак принудно дојде одлуката на средина на квалификациите?

Кирил Лазаров: Имав желба и јавно го кажувам ова, дека еден ден сакам да ја водам својата земја како селектор. Можеби дојде порано од очекуваното и предвиденото. Она што се случуваше во Египет (на светското првенство 2021) тешко го преживував како Капитен на репрезентацијата. Во изминатата деценија стекнавме респект од цел ракометен свет со нашите настапи како репрезентација која ја одликуваше борбеност, интелегенција и голема љубов према својата држава.

Во Египет се случи да одиме со наведнати глави пред цел ракометен свет кој беше таму, да едноставно остануваме во собите за да не ни се потсмеваат. Пробавме јас и поискусните играчи да ги разбудиме другите… не одеше никако, немаше реакција, едноставно се чувствуваше дека ни треба рестарт тотален.

Можеби Светското првенство во Египет беше едно од најлошите искуства во мојата репрезентативна кариера…

Го прифатив предизвикот без многу размислување.

Не се размислував ниту секунда, напротив со многу храброст и волја влегов во овој предизвик. На самото претставување, моите први зборови беа: Македонија не се одбива никогаш !

Данска е моја судбина !    

Неможеше подобро да помине циклусот квалификации за следното европско првенство. Рака на срце добро беше отворен со победите над Финска и Швајцарија. Но победа над Данска и уште две сигурни над Финска и Швајцарија за најмногу досега бодови во било кој циклус.

Кирил Лазаров: Данска е моја судбина !!!

Данска во Србија, Данска за почеток на тренерската кариера како светски и олимписки шампион и Данска во група за следното Европско Првенство…

Победата против Данска ми го наполни срцето и ме направи многу горд, но само за кратко … веќе по преспиената ноќ застанав цврсто на земја и многу свесно си ставив до знаење дека ова е само почеток.

Од играчката кариера имам многу искуство што ќе ми служи и во тренерската. Ме радува највеќе што успеавме колку толку да ја вратиме волјата и насмевката на нашите репрезентативци на овие натпревари.

Нивната посветеност, самодовербата, патриотизмот кој некаде го загубивме по пат во последно време, тоа се работи кои треба да ги негуваме.

Ние мораме на секој натпревар да бидеме на 120% ако сакаме да бидеме компетитивни и да веруваме и да правиме спортски чуда.

Почитта која ја изгубивме, пополека колку толку ја вративме во овие 4 натпревари. Треба да бидеме скромни и да го одиме нашиот пат. Можеби малку сум нереален, ама таков сум и бев како играч… мораме да веруваме, ние сме Македонија и не повеќе од 2 милиони жители.

Сте работеле со многу звучни тренерски имиња, ќе видиме сублимат од сите нив или Ваш поглед на ракометот?

Кирил Лазаров: Многу европски ракометни школи поминав. Немаше случајност кога за крај го одбрав Нант и француската школа на ракомет. Секаде научив по нешто.

Работев со врвни тренери и пред се добри луѓе, во мојата кариера. Не сакам да копирам никого, но сум благодарен на сите од кои сум учел. Имам свој поглед и сакам да изградам свој идентитет.

Подршка, ДА ќе ми биде потребна и ќе ја барам, но со посветеност и многу труд ќе успеам во она што го имам замислено.

Не очекувам да имам лесен пат …

Пишувавме после светското дека сега се игра нов ракомет, брзи пикери кои се први во контра, бекови кои не шутираат од далеку, трчање, трчање и многу трчање. Дали Ви се допаѓа тој ракомет.

Кирил Лазаров: Ракомет се игра за да победиш.

Трчање, шутирање, брзи пикери, средни бекови итн, се е тоа ок, за поздравување, меѓутоа историјата ја пишуваат победниците. Се сложувам дека треба многу иновативност, константност во секој поглед на ракометната игра, но исто така треба да се знае дека се паметат само победите и трофеите, другото не е доволно.

Ракометот допрва ќе се менува. Само најпосветените и најинтелегентните ќе успеат.

Македонците веќе подолг период играат 7 на 6.

Кирил Лазаров: 7/6 е начин на игра која што постои како правило во ракометната игра. Јас го почитувам ова правило и не сум подржувач да се менува. 7/6 придонесува да имаш стратегија плус кон одредени противници, да им отежниш да те победат, или да ги победиш.

Ние со Македонија игравме 7/6 со Данска во Скопје, но не и на другите натпревари. А од друга страна многу квалитетно се браневме против 7/6 со Финска и Швајцарија, кога ги приморавме како репрезентации да ни играат 7/6 затоа што 6/6 беа немоќни против нашата одбрана.

Што повеќе вакви детали, остава простор за надигрување со противникот и затоа не гледам ништо лошо во правилото 7/6 кое многу го оспоруваат.

Најадаптибилните секогаш победуваат.

Селекторе, во неколку наврати го издвоивте шпанскиот систем како еден од најдобрите. Што е всушност шпанскиот систем и дали Македонија ќе оди во тој правец?

Кирил Лазаров: Ми се допаѓа шпанскиот систем. Меѓутоа има повеќе видови на шпански системи, кои што детално ги имам опишано во мојот дипломски труд на ФФК. На Вас останува што најмногу Ви се допаѓа и што ќе одберете да користите, сепак е тоа личен избор. Како и претходно што кажав не е најдобро решение да копирате некого, напротив треба да бидете свои што е можно повеќе.

До македонскиот дрес само преку добра одбрана !    

Играме во одбрана 5 -1 и 6-0. Ќе продолжиме со тие две варијанти на одбрана или Македонија ќе има повеќе варијанти? Дали ќе играме согласно постулатот одбраната го добива натпреварот или сепак за гол повеќе?

Кирил Лазаров: Мораме да бидеме разноврсни доколку сакаме да бидеме калитетни. За да се усоврши една одбрана Ви треба долго време. Почнавме со 6-0, успеавме колку што ни дозволи времето да наместиме и 5-1 одбрамбена формација.

Планирам во иднина Македонија да има 3 добро истренирани одбрамбени формации со кои што Македонија би била препознатлива и незгодна како репрезентација. Се надевам дека сето тоа ќе успееме да го сработиме до почетокот на Европското Првенство во 2022 година.

Бевме препознатливи по бескомпромисната одбрана. Можеби највеќе кога играа заедно Велко Марковски, Аце Јоновски па и Миркуловски, Ангеловски, Стоилов. Низ годините го изгубивме тој жар, тој квалитет. Кој е виновен? Дали ке се обидете да ја вратите одбраната во тој гладијаторски мод? Евидентно е дека успеавте да ја задвижите одбраната да ја убрзате, а на последните натпревари видовме и еден безмалку изумрен елемент, блокирани шутеви.

Кирил Лазаров: Можеби приметивте дека во двете ЕХФ недели што ги имавме, шанса добиваа играчи што играа во 2 правци, то ест квалитетни одбрамбени играчи. Им го најавив тоа и на самите репрезентативци дека македонскиот дрес ќе се заслужува само со квалитетна игра во одбрана.

Мораме нашата одбрана да ја доведеме до совршенство. Задоволен сум до сега како се движат работите.

Кога можевме од Талески, Мишевски, Велковски, Младеновиќ и Марковски, кои што немаат многу минутажа дефанзивна во нивните клубови да добиеме 3 натпревари, тогаш треба да бидеме повеќе од задоволни.

Во нападот делуваме многу пошироко со Вас и со Миркуловски. Со кои играчи ќе ја градиме офанзивата во наредните години?

Кирил Лазаров: Работиме да имаме поширока база. 90% од базата се играчи од 19 до 25 години. Има многу талент и материјал за работа.

Загрижува минутажата на одредени играчи во нивните клубови. Играчите кога бираат клубови, треба да размислуваат и на нивните улоги кои што ќе ги имаат во клубовите. Што поодговорна улога, па макар и во помал клуб е подобра опција од седење на клупа па макар бил и најдобриот клуб во Европа. Има играчи што се задоволуваат со тоа што ќе постигнат договори со нашите најдобри клубови, а всушност не се свесни дека си ги упропастуваат кариерите. Седат на клупа во клубови, а имаат огромна желба да играат за национална селекција, многу нелогично …

Продолжува …

The post РAKOMETOT E MOJOT ЖИВОТ ! appeared first on Само Ракомет.