Всушност, Тиквеш е клубот кој за првпат ќе учествува на Финалните 4. Своевидно признание и за Кавадарци и нивниот тренер, еден од претендентите за титулата Најдобар Тренер во Македонија, Раде Стојановиќ. Под претпоставка дека некој ќе организира таков избор?!

Во три организирани и еден неорганизиран турнир, Ракометна Македонија ги доби финалистите. Во прилично очекуван исход, на безмалку секој натпревар, сем победата на Голден Арт над Пролет (таа сигурно не е случајна и очекувам наскоро да дознеме нешто повеќе) и на Мулти Есенс над Прилеп, Вардар, Пелистер, Алкалоид и Тиквеш се финалистите.

Од натпреварите кои ги погледнав можам да издвојам неколку заклучоци, во една форма која многу ја сакам а ретко ја ползувам, “Редење”

Гледавме прилично демоде ракомет, спор и неинвентивен, полупразни сали и публика оштра и често непотребно вулгарна и зајадлива, појаките не баш мотивирани, послабите свесни за слабоста, тренери коси што кубат оти тимовите не им се дисциплинирани, притисок врз судии, организациски парадокси и недоследности, стриминзи очајни и термини хаотични.

Видов и нешто убаво, дресовите на Бутел, малите Михајловиќ, Субашевски, Митев, Карасманакис и уште по некој, Алкалоид со организација за пример, испеана химната, стримингот со повеќе камери и коментатор, кој притоа го номинирам и за наградата Фер Плеј на Годината, кој во безброј ситуации потсетуваше дека противниците се без својот најдобар поединец, Респект !

По социјалните медиуми мојот предлог за реорганизација на Купот, почна да живее. Горд сум на тоа. Во предлог планот ги додавам и следниве забелешки, Интонирање на Македонската химна пред секој натпревар од купот задолжително, стримингот обавезно со коментатор, можат Кавадарци и Автокоманда, значи можат сите (предлог и за Првенството во целост) и воведување на пионерски куп натпревари, пред секој сениорски дуел, дуел и на најмладите. Со овие мечеви пионерите ќе ја почуствуваат возбудата на играње Куп и ќе се соочат со тимови од разни краишта на Македонија.

Засега толку

Да живее Македонија !

The post Во купот без изненадување! appeared first on Само Ракомет.

Википедија има една страна, посветено на Ракометниот Куп и во неа се сите основни статистички податоци. За жал кога зборуваме за ракомет и статистика, под се подразбираме, име на клубот година и резултат, и толку !

Ѓаволски тешка ќе биде задачата на секој кој ќе се обиде да создаде статистичка приказна во ракометот, но никогаш не е доцна да се почне. Би сакал оние двене мастодонски организации ИХФ и ЕХФ да се разбудат па да остават простор на некои ентузијасти кои би не вклучиле во модерните текови.

Нејсе, Македонскиот Ракометен Куп, одсекогаш бил шанса за некој мал, од сенка да изненади, да освои некој трофеј и да покаже дека ракомет играат и малите риби. За жал тоа се случило само во три години. Се прашувам зошто е тоа така и дали постои можност нивните шанси да се зголемат.

Бидејќи не успеав да откријам од кога датира актуелниот модел, ќе го земам како репер, таков каков што е!

Во структурата на Куп натпреварувањето, има три фази, прва во која “малите” се чистат меѓу себе, втора во која “големите” ги требат “малите” и трета, да признавам исклучително интересна, таканаречен Финални 4, кога го добиваме освојувачот.

Што ми е поентата? Ако купот треба да биде натпреварување пропратено со неизвесност и изненадувања, можеби треба да го смениме форматот.

Па јас вака би играл: Во еден барабан ги ставаме сите клубови, па извлекуваме, кој каква среќа има, играме на теренот на послабо рангираниот, еден натпревар! Можно е во прво коло да паднат Вардар против Пелистер и еден голем веќе да нема. Можноста “малиот” да дочека “голем” клуб зголемена, да има шанса во еден натпревар да направи чудо, извесна, приликата да ги израдуваме љубителите на ракометот од тој град да видат екипа од Лигата на Шампиони или од Лига Европa бесценета!

Ми делува просто и изводливо.

А до тогаш да уживаме во елиминациите, онакви какви што се!

The post Куп на Македонија во Ракомет appeared first on Само Ракомет.