Судејќи по сите параметри, разврската конечна, според очекувањата. Никогаш не ја преценував екипата на НЕКСЕ, секогаш велев дека е маалска, ама добра. Но овој Пелистер секако е граден и поставен на повисока скала.

Проблематична на моменти е реализацијата на Кузмановски и Костески, имајќи в предвид дека тие момци се иднината на Македонската авијација. Тешка артилерија нема, но на моменти и Сери и Суси покажуваат знаци на живот. Голмански врвно, одбраната кога ќе се притегне, очекувам уште подобри резултати. Пелистер игра тимски, малку споро што е за очекување со оглед на неуиграност на тимот но потполно неочекувано со оглед на скандинавскиот кормилар. Времето ќе покаже по кој курс ќе плови бродот.

Најсветлиот момент во ликот и делото на Марио Танковски. Тој треба да му заблагодари и на португалецот но пред се на Данецот, кој делува дека има полна доверба, на што очигледно Марио добро изреагира. Ако продолжи со ваков ритам, да ја подига формата, дрскоста, самодовербата и реализацијата, на Лазаров ќе му следи период на слатки маки за позицијата среден.

Од она што сакам наскоро да го видам ми остануваат недоискажани Кизиќ, Атанасијевиќ и Ѓорговски. Данецот во неколку наврати ги уфрлаше на терен, што значи веројатноста низ суперлигата да играат ќе биде огромна, а тоа пак значи ќе имаат шанса да се изборат и за минути од есенцијален значај во Лигата на европа.

Со надеж дека ова ќе биде последен СЕХА Ф4 во кој немаме претенденти за трон, остануваме со очите вперени кон домашното првенство и со нетрпение ја очекуваме фазата по групи на ЛЕ.

ПС убаво делуваше финалето со крилата на Загреб, и ќе беше како во приказните, земете го Чупко (и Тимур) ако сакате титула.

The post И волкот сит и овците на број appeared first on Само Ракомет.

Мојата 4 та спортска љубов, америчкиот фудбал, ми откри нови ракурси на спортот генерално. Таму навистина е важно, но без тајни, за какви дострели и со која метода се гради еден тим. Па следствено на тоа, пак моите идоли од First Down, ги делат тимовите на Pretender и Contender тимови.

За појасно да биде, овие првиве се сериозни во својот формат, деловен пристап и пракса, но не се амбицираат на висок пласман. Имаат пристоен тим, со малку или воопшто звезди и имаат за цел да ја забавуаат својата публика. Овие пак вториве, се со пофокусирани цели, влогот и финансиски и играчки е поголем, иако не премногу оти имаат ограничувања, и имаат високи цели. Така и се однесуваат, во предсезоната, сезоната и секако во плеј офот. Најчесто целта е финале, а неретко и титула.

Битолчани се во фаза во која се и едното и другото, во зависност каде играат. Па така веќе трета година се сериозни Контендери во македонското првенство. Амбициите се јасни, а одредени медиуми веќе и ги поставија на првата позиција фаворити за сезонава. Досега толку високо не биле никогаш поставени, па оттука, притисокот годинава ќе биде најголем. Од друга страна нивните настапи во Лигата на Европа и годинешниов во СЕХА, ја оддава нивната втора страна, Притендерската. Што во крајна линија е прилично легитимно. Да не дојдеше до сериозното проветрување играчко и тренерско, јас бев на пат да ги поставам и во Лигата на Европа како Контендери, но сепак малку ќе причекам.

Радува пристапот на Ларс, тој се обиде да изненади, не дека 7 на 6 е нешто ново, но апсолутно беше новина да излезете на мегдан со Маџарине од прв напад токму со тој пристап. Неискуството тимско, како и сеуште нестекнатата доверба и познавање на играчите внатре, едноставно не му дозволија да извлече ништо повеќе од десетина добри минути. Борбата која ја гледавме против белорусите, вчера ја немаше. Одбраната непостоеше, и можеби единствена замерка ќе упатам на делот на залагање во одбраната. Кој и да е противникот колку и да е појак, колку и да беше јасно месец два понапред дека Пелистер нема шанси со Веспрем, чинам дека кожата требаше поскапо да се продаде.

Утре е нов ден, нов испит, Нексе веќе докажан противник, иако видовме дека кога се авторитети во прашање и тие имаат сериозни проблеми, очекувам да ги видам Битолските Зелените во едно навистина по зрело издание.

Кон поразот на Пелистер од Веспрем во полуфиналето на СЕХА Ф4 2022, во Задар.

The post Битолските Зелени appeared first on Само Ракомет.

Навистина исклучителна тешка задача е пред битолчани. Веспрем на мојата листа на топ 10 клубови во светот е многу високо. Само проклетството не им дозволува да се закитат со титулата во Лигата на Шампионите.

Битола е малку поголема од Веспрем, а Пелистер е нешто постар клуб, но двата клуба имаат прилично различна историја. Сепак во моментов двата клуба се и на различна фаза од развојот на клубот па и на тимот.

Пелистер влегува во новата фаза по потпишувањето на платформата за ракометна Битола, добивајќи стабилни финансии и добро втемелен патоказ. Битола сака титула првак на Македонија и излез на блескавата сцена на Лигата на Шампионите. Од како се ослободија од балканскиот шмек играчки и тренерски, битолчани се завртија на југ и малку полево и погоре. Ангажирајќи мешавина од одлични африкански и европски играчи, силно надополнети со македонци во ростерот.

Е сега ако земеме в предвид дека овој тим е заедно само неколку недели, и одигра едвај 4-5 натпревари, а од друга страна чека Веспрем, при тоа читајќи ја изјавата на Валтер дека очекува добра забава, јасно е зошто коефициентот е поставен 1,05 за победа на Веспрем и фантастични 12 за победа на Пелистер.

Долго време барав дупки во аналитичарите на големите обложувалници и убеден сум дека ги има многу, но овој пат со жалење констатирам дека се блиску до вистината.

Како и да е, Веспрем е апсолутен фаворит, иако таков беше и на тој 2 октомври 2019 па сепак Пелистер му го зема скалпот, но ние впрочем сеуште не го знаеме вистинското лице на овој нов Пелистер. Па тука можеби се крие и најголемата предност.

Повторно датумот е втори, па ако се потпреме на суеверие а не на ракометни факти, можеби вреди да се ризикува !

02.09.2022 во Задар од 20,30ч Веспрем Пелистер, полуфинале

The post Битолчани дебитанти на СЕХА Ф4 appeared first on Само Ракомет.

Марио Танковски, срамежливо, кренат в раце од Чкембари, пееше за својот клуб. Тој долго време е еден од моите фаворити за среден. Ем стружанец, ем брз, одличен шут, добар преглед, само самодовербата беше прашање. И ако го прашате другар ми Манце, вака ќе речи, Бабиќу го уназади Марио, Марио воскресна, вистина воскресна !

Во неколкуте засилувања, не сите, што е и во крајна линија добро, а ќе објаснам зошто, Пелистер добива нова физиономија. Овие африканциве, по природа на нештата, а не како некој шериф сака, се наши стари пријатели, од времето на неврзаните, па тие таа енергија ќе ја почуствуваат, и ќе возвратат. Се надевам. Лесјак е одличен голман, ќе го повлече со себе и Кизо, па и тој, впрочем како и вчера, ќе се надгради. За русинот зборевме со Тимур, вели, солиден, добар играч. Ќе видиме. Ако по утрото денот се познава, овој русов е борец од висок калибар, очигледно Битола ќе му годи, и тој би требало да биде исклучителна алка во Пелистерскиот бедем. Французов не е сам, има фино друштво околу себе и ако за нив важи дека се малку недисциплинирани и неодговорни оваа средина би требало да го насочи добро. За да не избрзам ама сепак да објаснам од погоре, чинам дека средниов, португалецов не е на ниво, ама тука е и кваката, го добивме Марио. Во еден момент на теренот поставата изгледаше вака, Кизиќ, Кузмановски, Ѓорѓески, Танковски, Пешевски, Костески … УЖИВАВ !

Ако одам за Битола, ќе прошетам по Широк Сокак, Јас пиво ќе се напијам и ќе наздравам !

Голема работа заврши синоќа Пелистер ! Им паднаа многу камења од срце. На навивачите, на Чкембарите, на Стерјеви можеби најмногу.

Можеби Мешков и не беше толку сериозен противник, но кршењето на мразот, карактерот на новата екипа, смиреноста на данецот, учинокот на македонците, спортската среќа на крајот, се клучна придобивка за Битолскиот, Македонскиот ракомет.

За разлика од оној девољубецот, овој новиов данецов, тргна тивко и без многу помпа, ако успее да ја гради така и екипата, да не заборавиме дека тој воопшто не го активира можеби и најголемото засилување летово, тогаш можеби една значајна сезона е пред нас.

Им посакувам мирно море на јадранот, нека уживаат најмногу во дуелот со една од најјаките екипи во светот, нека се сетат дека пред некоја година се радуваа на победа кога никој не очекуваше, па можеби ќе стигнат позитивни сигнали.

Имав и друг наслов, Битолски рулет, и тој не беше лош. Впрочем колкави беа шансите двата македонски претставници да играат дома дуел од четвртфиналето и да играат на пенали. Ах да имав и за судиите коментар …

25.08.2022 Битола, Македонија

СЕХА Лига 1/4 финале

Еурофарм Пелистер 27:26 Мешков Брест, на пенали

The post За Солуна, за Стамбола, Битола не давам! appeared first on Само Ракомет.

Решивме овојпат да испиеме по една во Русија. За подршка на клубот, на семејството. За демонстрација на став.

Има повеќе предности, да се биде пред сала 2 часа пред натпревар. Голема е можноста да видиш голем број од актерите, да поразговараш со нив, да се сликаш, да видиш каква е атмосферата.

Се ракуваме со еден од нив, цврсто, охрабрувачки му велиме, уплативме илјадарка, За кого ? не праша …

Да скратам, во очите на неколкумина домашни видовме многу страв, неизвесност, можеби и недостаток на самодоверба.

Така и беше. Вардар излезе во најсилниот состав, тој е нема друг, но во неговата игра се чувствуваше напнатост, нервоза, несигурност. Првите минути тешки најтешки. Неколку шутеви завршија многу необично над пречката. Нексе, силно, самоуверено, но сепак без екстра квалитет, полека го презема водството. Но, Вардар се држеше блиску. Дел затоа што успеваше да најде решение во напад, преку Талески, дел поради големото искуство на неколкумината кои се држеа во одбрана. Имаше и публика, повеќе од колку што очекував и добра беше.

Како одминуваше натпреварот, притисокот се избалансира, па и гостите почнаа да грешат. Публиката беше јасна, судиите досудија по една две за обете екипи, но голманите ја направија разликата. Вардар имаше неколку напади за сигурно водство но неуспеа. Вардар имаше и 17 секунди за последен напад на нерешено но неуспеа. Пеналите беа рулет во кој сите бевме свесни дека Вардар ќе изгуби. Зошто? Секогаш е така незнам, космосот одговара.

Вардар ги покажа сите свои можни слабости, недостаток на ротација, недостаток на самодоверба, недостаток на воиграност, и како што ретко се случува лош ден на голманите. Хрватите имаа 16 интервенции нашите само 6 !

Значи Вардар сепак играше добро, погледнато низ статистиката, реализира 30/54, Нексе 32/42, вклучително и пеналите. Вардар имаше 2 изгубени топки, Нексе 10, му недостасуваше дрскост и агресивност па како домаќин имаше само 3 исклучувања а гостите дури 5.

Некако како на сите да ни олесна. Испаднавме ама нема да се мачиме во Задар ! Изгубивме ама бевме блиску !

Ој Вардаре Македонски, ти ја красиш Македонија… одамна не ја пуштаат на разглас !?

23.08.2022 Скопје Македонија

СЕХА Лига 1/4 финале

Вардар 30:32 Нексе, на пенали

The post Вардар можел !? appeared first on Само Ракомет.

Задар е најстариот град во Хрватска. Втор по големина во Далмација и 5 ти во Хрватска.

Одалечен е околу 1000 километри од Македонија, нешто помалку ако се користи патот покрај Јадранот.

Вистинското прашање кое не мачи деновиве, а за кое ќе добиеме конечен одговор до крајот на неделата е колку се далеку Вардар и Пелистер од Задар?

Судејќи по настапот на струшкиот, но делумно и по говорот на телата на некои од клучните актери во Скопје и Битола, Задар е дааалеку ….

Во Скопје работите одамна не се како што беа. Одлична екипа, здрав спонзор, верна публика, Лига на Шампиони, скалпови на нај јаките, ракометна треска.. Ништо од тоа не остана. Верувам дека во Јане нема да има повеќе од 500 најверни овојпат. Но Вардар сепак има една многу сериозна постава во моментов. Со Томовски на голот, кој расте од сезона во сезона, врвниот Манасков кој допрва ќе го видиме во вистинско светло, одличните Ѓеоргиевски и Џукиќ на десно крило, Талески кој експлодира, Столе капитенот натоварен со искуство ко александриска библиотека со текстови, Цврстиот Куни и Карапалевски на центар кој се некако чекаме да блесне, Вардар има една ротација за респект. Проблемот почнува кога некој од овие треба да одмори. Мишевски кој долго време е на сцена никако да не убеди дека е на право место, Вардар на средина нема сеуште план Б. Десно и Савревски делува безопасно и преспоро, се чини само на пикер Лазаревски и Атанасовски можат да дадат нешто во двата правци.

Следната енигма е и клупата, Владо е исклучително млад како тренер и допрва ќе може да ги видиме резултатите од неговото чиракување годиниве.

Со натажен лик мора да признаам дека хрватите се апсолутни фаворити, но Вардар е шампион и ако така се однесува надеж сепак има !

Во Битола работите стојат сепак малку поинаку. Тие и покрај за нив неуспешната сезона во борба за титула во Македонија напредуваа многу. Се ослободија од извесен баласт во ликот и делото на Бабиќ, но како што покажаа верните Чкембари во Струга и од Стипета. Промените играчки се драматични, ги нема носителите од минатите сезони, но духот како да е сеуште жив. Новаците сега се свесни за битолското ракометно општество, за товарот и одговорноста која ја преземаат. Со комплетно нова бековска линија, нови пикери и нов одличен голман, систем на клупата, наместо погледи кон небото, Пелистер секако зачекорува во нова ера. Сери и Хосни покажаа многу во Струга, Лесјак најдобар голман, Жаре МВП, Танковски зема воздух, колку време ќе го задржи е прашање, ако го вклопат и последнодојдениот Суси, можеби Битола и да не е така далеку од Задар.

Во Битола има уште адути, салата очекувам да биде преполна, атмосферата е врвна, клупата на битолчани многу посериозна. Дел со искусни а дел со младите кои покажаа дека можат да гризат.

Иако Пелистер сеуште нема победа против белосрусите, иако сеуште не сме сигурни како ќе игра овој реновиран Пелистер, размислувам за единица фикс !

СЕХА која делуваше дека е во кома, покажува знаци на живот. До кога не се знае.

The post Патот до Задар appeared first on Само Ракомет.