Фото EHF home of handball
Поминаа пет дена. Не, не од последниот работен ден на службениците во ЕХФ, туку од последниот обид некој од нив да се јави и да објасни што точно се случува со финалето на ЕХФ Купот. Пет дена тишина. Пет дена молк, длабок како да се изгубил сигналот над Атлантикот. И затоа, простете ми на аналогијата, ама искрено се чувствувам како патник во авион од култниот филм „Има ли пилот во авионот?“ – само што овој пат никој не се обидува да го спаси летот. А и да сака – нема кому да се обрати. Кабината е празна.
Во неделата требаше да се одигра финалниот реванш помеѓу РК Алкалоид и АЕК Атина. Требаше. Наместо натпревар, видовме само едностран обид за спортска правда – еден тим излезе на терен, другиот се уплаши од „македонската публика“. Според АЕК, Скопје е повознемирувачко место од Газа, а публиката поопасна од севернокорејска парада. Причините за нивното повлекување? Па, официјално: „безбедносни грижи“. Неофицијално? Повелете сами погледнете на YouTube – 5.000 луѓе, деца, семејства, со тапани, знамиња и страст. Очигледно премногу за некому навикнат на хулигани, убиства, демолирање, насилства…
И додека сите се прашуваме дали ќе има одлука, санкција или барем соопштение, ЕХФ упорно глуми ракетна база од која никој не се јавува. Паралелно, сите македонски клубови, играчи, навивачи и ракометни вљубеници, слушаат само едно: „Автоматската секретарка на ЕХФ не е достапна, обидете се подоцна.“
И тука веќе не зборуваме за спорт. Зборуваме за управување. За кредибилитет. За фер-плеј. Зборуваме за тоа дали има некој таму што ја води оваа институција. Или ако веќе има – дали некој друг му ги пишува скриптите?
Во меѓувреме, Фармацевтите и цела Македонија останаа без својата заслужена вечер, играчите без историски натпревар, публиката без спектакл, а ракометот – без достоинство. А ЕХФ? Таа остана без глас. И без пилот.
Ако некој од ЕХФ го чита ова (а верувам дека Google Translate им е инсталиран), ќе биде убаво барем некој да се јави и да каже: „Да, тука сме. И да, знаеме што правиме.“
Или барем да не се чуди кога следниот пат некој ќе ги праша:
„Има ли пилот во ЕХФ?“
